開Page目的係想分享多啲職場資訊，減少大家俾人搵笨嘅機會，但原來我先至係成日俾人搵笨嗰個，以下係《辦公室日報》多咗人認識之後，inbox收到嘅經典「合作」方案，同時想講一個概念，打工又好，Run一盤生意都好，每個人都應該有價有市，8千蚊返5日半都有人做，咪搞到成個市場充斥低薪職位囉; 收幾百蚊請你食個飯就幫手寫鱔稿，咪搞到全香港食店都係「必食」囉，香港米芝蓮仲多過7仔呀。
※免費午餐換一篇鱔稿※
西式酒吧客話俾500加一餐Free Lunch，叫我幫手寫篇打工仔放假去邊度食嘢減壓嘅鱔稿，又係嗰種:「嘩，入口即溶呀，打工仔一定要嚟呢度試試，隱世米芝蓮!!!」
問多佢一句:「真係米芝蓮?」
客:「隱世隱世，即係冇乜人知，但又有米芝蓮水準」
「即係唔係米芝蓮?」
客:「好多page都係咁，薄酬加一餐免費飯去寫鱔稿。」
嬲嬲指數 😡😡😡😡
何必要我寫假嘢，累人山長水遠去食你啲唔係米芝蓮又扮米芝蓮嘅普通嘢，過主啦！我唔食Free Lunch，你都唔好食我Free Lunch。
※賣西裝逐件分佣※
個客係賣西裝嘅，佢話俾錢賣廣告冇意思，不如我幫佢出個post，啲網友去訂造西裝時講明係睇到《辦公室日報》，我就有得分佣，廣告費係每賣出一套西裝，就會分返佣俾我。
嬲嬲指數😡😡😡
不如我辭咗份工，全職幫你做sales跑數，再將個page改名做《西裝日報》，合併再上市，再分拆又再上市，咁咪仲好。
※分享Page義務宣傳※
呢個最離譜兼遇過最多，有啲唔知咩Page會inbox我，叫我直接share佢哋內容，或者合作出Post幫佢哋宣傳。
嬲嬲指數😡😡😡😡😡
我真係唔明，點解你做個page唔係靠自己寫好內容去吸引人，而係要諗呢啲縮骨橋呢?
前車可鑑，宏利員工賤價$500-700請人製作上太空廣告、港媽facebook索攝影師免費贊助、學士學位加10年經驗做發展幹事人工$10385， 你做就玩完架喇，以後廣告宣傳變返石器時代以物易物，10年經驗收1萬人工就叫標準市價，最後只會攬住一鑊熟，大家都搵唔到食。
Search